Platforma Evropiane e Edukimit Shkollor është pika e takimit për komunitetin e mësimdhënësve që punojnë në institucionet parashkollore, arsimin fillor dhe të mesëm të ulët, arsimin e mesëm të lartë, dhe arsimin dhe aftësimin profesional. Platforma është pa pagesë në të cilën është e integruar edhe eTwinning, komuniteti online për shkollat ​​në Evropë.

​

eTwinning është një komunitet për shkollat, një hapësirë ​​online që ofron mundësi për mësimdhënësit, nxënësit dhe shkollat në të gjithë Evropën për të punuar së bashku në projekte, për të diskutuar në grupe online, për të shkëmbyer praktikat më të mira dhe për të zhvilluar aftësitë profesionale. eTwinning promovon mësimin e bazuar në projekte, shkëmbimin kulturor dhe qytetarinë dixhitale. 

​

Në janar të vitit 2024, Kosova është bashkuar zyrtarisht komunitetit eTwinning që ka më shumë se 40-të vendeve duke përfshirë shtetet anëtare të BE-së, si dhe disa vende jo anëtare të BE-së që marrin pjesë në eTwinning. eTwinning në Kosovë financohet nga Bashkimi Evropian në kuadër të programit Erasmus+, i cili synon të mbështesë arsimin, trajnimin, rininë dhe sportin në Evropë dhe Ministria e Arsimit, Shkencës, Teknologjisë dhe Inovacionit në Kosovë. Projekti eTwinning në Kosovë implementohet nga Zyra Kombëtare Mbështetëse për eTwinning në Kosovë. 

Në qershor të vitit 2024, në Ministrinë e Arsimit, Shkencës, Teknologjisë dhe Inovacionit (MASHTI) në Kosovë është bërë edhe lancimi zyrtar i projektit eTwinning në Kosovë nga Ministria e Arsimit, Shkencës, Teknologjisë dhe Inovacionit Znj. Arbërie Nagavci, - ministre e arsimit, Z. Johannes Madsen - udhëheqës për bashkëpunim nga zyra e Bashkimit Evropian në Kosovë dhe Znj. Mimika Dobroshi - koordinatore e zyrës Erasmus+ në Kosovë. Në event lancimi ishin pjesëmarrës edhe zyrtarë nga MASHTI, zyra e Bashkimit Evropian në Kosovë, drejtoritë komunale të arsimit në Kosovë, fakultetet e edukimit të Universiteteve Publike në Kosovë, media, etj.

Anëtarësimi në komunitetin eTwinning u ofron shkollave dhe mësimdhënësve të arsimit parauniversitar në Kosovë përfitime të shumta:

• Bashkëpunimi ndërkombëtar: Mësimdhënësit mund të angazhohen në projekte bashkëpunuese eTwinning me partnerë nga Kosova dhe nga vende të tjera, duke pasuruar përvojat e mësimdhënësve dhe nxënësve;

• Mësimi i avancuar: projektet eTwinning promovojnë të mësuarit aktiv, të menduarit kritik dhe aftësitë e zgjidhjes së problemeve përmes aktiviteteve praktike, ndërkulturore, etj.

• Zhvillimi Profesional: Mësimdhënësit dhe stafi i shkollës mund të kenë akses në burime të shumta informacioni, mundësi trajnimi dhe mbështetje për të përmirësuar praktikat e tyre të punës dhe për të qëndruar të përditësuar me trendet arsimore evropiane.

• Shkëmbimi kulturor: Mësimdhënësit dhe nxënësit  kanë mundësinë të ndërveprojnë me partnerët me prejardhje të ndryshme kulturore, duke nxitur mirëkuptimin dhe tolerancën.

• Integrimi i TIK-ut: eTwinning inkurajon përdorimin e teknologjisë në arsim, duke ndihmuar shkollat ​​të përdorin mjetet dhe burimet dixhitale për të përmirësuar mësimdhënien dhe të nxënit.

• Njohja dhe Çmimet: Mësimdhënësit mund të marrin mirënjohje dhe vlerësime për projektet e tyre eTwinning në nivel kombëtar dhe ndërkombëtar. Gjithashtu, mësimdhënësit të cilët kanë zhvilluar me sukses projekte eTwinning dhe janë vlerësuar me Etiketa të Cilësisë kanë mundësi të aplikojnë për eTwinning Ambasadorë të cilët janë promoterë të projektit eTwinning në Kosovë.

​

​

Raporti vjetor për eTwinning në Kosovë për vitin 2024

Raporti vjetor për eTwinning për vitin 2024 ofron një përmbledhje të arritjeve kryesore të projektit eTwinning në periudhën 01 Janar 2024-31 Dhjetor 2024. Përmes statistikave, dokumenti reflekton numrin e institucioneve arsimore në Kosovë të regjistruar në platformën Evropiane të Edukimit Shkollor dhe eTwinning, numrin e regjistrimeve në nivel të arsimit, numrin e projekteve evropiane eTwinning të inicuara nga mësimdhënësit dhe fushat në të cilat janë duke u zhvilluar projektet eTwinning. Gjithashtu, raporti prezanton edhe aktivitetet e projektit të realizuara nga Zyra Kombëtare Mbështetëse për eTwinning në Kosovë gjatë vitit 2024.

​

​